இயற்கை அறம்!

உ

இயற்கை அறம்!
- உத்தமபுத்திரா புருஷோத்தம் 17-Apr-2018
நீரின்(றி) அமையா(து) உலகு  நெருப்பின்றிச் சமையா(து) அகிலம் காரின்றிப் பொழியாது வானம்  கதிரின்றிச் சுழலாது வையம் சீரின்(றி) உலவாது ஞாலம்  திகிரி(யி)ன்(றி) உருளாது காலம் பாரின்றி விளையாது பயிர்கள்  பசியின்றி வளராதே உயிர்கள்!	1
கதிரின்றிப் புலரா(து) இரவு  கருவின்றி மலரா(து) உறவு நதியின்றித் திரளாது பண்பு  நலமின்றித் திகழா(து) அன்பு மதியின்றிக் குலவாது ஞானம்  வளியின்றி நிலவாது சீவம் பதியின்றிச் சிறவாது பெண்மை  பாதியாய் நிறைவதே உண்மை!	2
மலையின்றிப் பிறவாது நீறு  மடுவின்றிச் சுரவா(து) ஆறு நிலையின்றி நிறையாது மனது  நிழலின்றி மறையாது நிலவு விலையின்றிப் புரியா(து) அரிது  விரைவின்றித் தெரியாது பொழுது அலையின்றிப் புரவாது மேகம்  அமுதாகிச் சொரியாதே வானம்!	3
விருப்பின்(றி) ஈர்க்காது ஞாலம்  விழிப்பின்றிச் சேர்க்காது ஞானம் சுரத்தின்(றி) உதிக்காது கானம்  சுவையின்(றி) உவக்காது மோனம் கருத்தின்றிக் கனியாது கவிதை  கலையின்(றி) இனியாது காதல் விருத்தியில் நிறையாதே ஆசை  வெளியின்றிப் பரவாதே ஓசை!	4
குருவின்றித் தெளியா(து) அறிவு  குறையின்(றி) ஒளிராது நிலவு இருப்பின்றி வற்றாது செல்வம்  இறுதிக்கும் முற்றாது கல்வி திருவின்(றி) உய்யாது குடிமை  திறனின்றிப் பொய்யாது மடிமை அருளின்(றி) அமையாது சித்தி  அன்பின்(றி) அடையாதே முக்தி!	5
நலனின்றிச் சுகிக்காது சேர்க்கை  நட்பின்றிச் சகிக்காது வாழ்க்கை பலமின்(றி) ஏறாது பாகை  பணிவின்றிச் சூடாது வாகை பலனின்றிப் போகாது உழைப்பு  பயனின்(றி) ஆகாது பிழைப்பு மலமின்(றி) உய்வதே பிறப்பு  மரணித்தும் வாழ்வதே சிறப்பு!	6
அச்சமின்றி நடப்பது துணிவு  ஆழ்ந்துபின் முடிப்பது துணிபு துச்சமென்(று) இகழாது ஆண்மை  தோல்வியில் துவளாது மேன்மை இச்சகத்தில் மகிழாது பெருமை  இழிவென்று நெகிழாது சிறுமை உச்சமென்று விழையாதே பொய்மை  உயிரின்றிப் பிழையாதே மெய்மை!	7
திரியின்(றி) ஒளிராது தீபம்  திரையின்றித் துளிராது ஞாலம் வரியின்றி வளராது தேசம்  மலரின்றிக் கிளராது வாசம் பரிவின்(றி) உருகா(து) உள்ளம்  பனியின்றிப் பெருகாது வெள்ளம் பிரிவின்றிப் புரியாது பாசம்  பிளவினில் தெரியாதே நேசம்!	8
நகையின்றிப் பயக்குமோ நலம்?  நாணின்றி நயக்குமோ குலம்? பகையின்றித் தெளியுமோ பலம்?  படையின்றி நிலைக்குமோ வயம்? வகையின்றிச் செழிக்குமோ வளம்?  வரையின்றிக் கொழிக்குமோ நிலம்? தகையின்றிச் சேருமோ நீட்சி?  தாழ்வின்றி நேருமோ மீட்சி?	9
விழியின்றி நிறக்குமோ வண்ணம்?  வினையின்றிச் சிறக்குமோ எண்ணம்? தொழிலின்றித் துலங்குமோ வாழ்வு?  தொடர்பின்(றி) இலங்குமோ சால்பு? மொழியின்றி முளைக்குமோ இணைப்பு?  முனைப்பின்றிக் கிளைக்குமோ பிணைப்பு? எழிலின்றிக் கொஞ்சுமோ பொய்கை?  இயற்கையை விஞ்சுமோ செய்கை?	10
* முற்றும் *

அருஞ்சொற் சூழ்பொருள்:
---
அரிது = அரியவை, அபூர்வமானது	நெகிழ் = இளகு, நழுவு, விலகு, பிரி, அழி
இச்சகம் = வெற்றுப் புகழ்ச்சி, முகஸ்துதி	பதி = தலைவன், இறைவன்
இருப்பு = இருத்தல், வாழுதல், தங்கு	பாகை = தலைப்பாகை, மகுடம்
ஈர் = இழு	பார் = உலகம், பூமி
உய் = நற்கதி அடை	பிணைப்பு = நெருக்கம், நட்பு, காதல்
குடிமை = குடிப்பிறப்பு, குடி மேம்படல்	புரவு = பாதுகா, பரிசு, கொடை, செழுமை
குலவு = நெருங்கி உறவாடு, தங்கு, பொலிவுறு	பொய்கை = இயற்கை நீர்நிலை, குளம்
சகி = பொறு	பொழுது = காலம்
சால்பு = மேன்மை, உயர்வு, சிறப்பு	மடிமை = சோம்பல்
சீவம் = சீவன், உயிர்	மடு = சுனை, பொய்கை
சுரத்து = ஈடுபாடு, சிரத்தை	மலம் = மும்மலம் (ஆணவம், கன்மம், மாயை)
செய்கை = செயல், வினை, செயற்கை	முற்று = நிறைவு, முழுமை, பூரணம்
சேர்க்கை = துணை, தொடர்பு, புணர்ச்சி	வயம் = வெற்றி
தகை = பொருத்தம், மதிப்பு, நன்மை, நலம்	வரை = எல்லை, வரம்பு
திகிரி = சக்கரம், சுழல், வட்ட வடிவம், சூரியன்	வளி = காற்று
திரை = அலையெழு, ஓடை, நதி, ஆறு	வாகை = வெற்றி
நகை = மகிழ்ச்சி, மலர்ச்சி, சிரிப்பு	விருத்தி = இனப்பெருக்கம், வளர்ச்சி
நாண் = நாணம், மான உணர்ச்சி	விழை = மதி, விரும்பு
நீறு = சாம்பல், புழுதி, சுண்ணாம்பு, விபூதி	வெளி = காற்று வெளி, Space
***